Sendi 250 sleikipinna í grunnskólann vegna öskudags
Sigríður Hrönn Gunnarsdóttir hárgreiðslumeistari á Reyðarfirði brá á það ráð að senda 250 sleikipinna í grunnskóla bæjarins fyrir öskudaginn sem er í dag. Þetta gerði hún vegna þeirra sóttvarna sem eru í gildi.„Ég held að fleiri fyrirtæki og einstaklingar hafi gripið til þessa ráðs þar sem búið var að gefa út tilmæli um hvernig sælgætisgjafir ættu að fara fram í dag,“ segir Sigríður Hrönn. „Kennararnir sjá svo um að úthluta þessum sleikipinnum meðal barnanna.“
Fram kemur í máli hennar að undir eðlilegum kringumstæðum væri hún stöðugt að hlusta á börn syngja á hárgreiðslustofu sinni frá klukkan hálf tíu og framundir hádegið.
„Það hefur yfirleitt verð mikill og jafn straumur barna á stofuna mína á þessum degi. Og ég var hrifin af því að eldri börnin voru með þau yngri með sér,“ segir Sigríður Hrönn.
Fyrr í mánuðinum gaf aðgerðastjórn almannavarna út leiðbeiningar um hvernig ætti að standa að sælgætisgjöfum til barna í dag. Þar var beðið um að foreldrar og aðrir myndu gæta sérlega að sóttvörnum.
„Auk hefðbundinna leiðbeininga um sóttvarnir skal bent á eftirfarandi; að tiltekinn starfsmaður annist samskiptin við börnin fyrir fyrirtækið, að börnin syngi utandyra, að einungis sérinnpakkað sælgæti sé boðið og það sé afhent hverju barni í stað þess að öll börn fari með hönd ofan í sama ílátið,“ segir í leiðbeiningunum.
