Samið við hljóðkerfaleiguna um rekstur Egilsbúðar
Bæjarráð Fjarðabyggðar hefur samþykkt drög að samningi við G.V. Hljóðkerfi ehf. um leigu á félagsheimilinu Egilsbúð. Ekki verður föst veitingasala í húsinu.
Frá þessu skýrði Páll Björgvin Guðmundsson, bæjarstjóri Fjarðabyggðar, á íbúafundi í Neskaupstað í gærkvöldi.
Hann sagði að ekki yrði dagleg veitingasala í húsinu en í tengslum við skemmtanir yrði bar og veitingasala.
Þá stendur til að fara í töluverðar viðhaldsframkvæmdir á húsinu sem SÚN mun styrkja. Ekki hefur þó verið samið um nákvæmlega hvaða hætti það verður.
„Við sjáum fram á að þetta hús sé aftur að fara að vaxa miðað við það sem við settum fram í byrjun desember,“ sagði Páll og bætti því við að rekstur Egilsbúðar yrði nánar kynntur af nýjum leigutaka á næstu dögum.