Rýmt í varúðarskyni á Seyðisfirði í kvöld
Ákveðið hefur verið að rýma öll hús við Botnahlíð, Fossgötu og gamla Austurveg á Seyðisfirði, auk húsa við Hafnargötu, Múlaveg og Baugsveg, í kvöld vegna hættu á aurskriðum. Enn er verið að læra á hvað hlíðin fyrir ofan sunnanverðan bæinn þolir eftir skriðuföllin þar um miðjan desember.Hættustigi hefur verið lýst yfir á Seyðisfirði vegna úrkomuspár á Austfjörðum í nótt. Spáð er austan- og norðaustanátt og búist við að uppsöfnuð úrkoma á Seyðisfirði geti jafnvel orðið yfir 60 mm. Hún bætist við 70 mm úrkomu og leysingar frá því á laugardag. Hlýtt hefur verið í veðri síðustu daga og talsverð leysing síðan um helgina.
Lítilsháttar skúrir hafa verið á Seyðisfirði í dag en búist er við mestri ákefð í úrkomunni frá klukkan 18-24 í kvöld. Rýmingunni á að vera lokið fyrir klukkan 19:00.
Í tilkynningu segir að rýmingin sé í varúðarskyni þar sem enn sé óvissa um stöðugleika hlíðanna í Botnabrún eftir hamfarirnar í desember og hvernig jarðlögin þar bregðist við ákafri úrkomu.
Rýmt er til að byrja með við minni rigningu og/eða leysingu en áður, þar til meiri reynsla fæst á stöðugleika hlíðarinnar. Þessi reynsla fæst með því að fylgjast með því hvernig jarðlög bregðast við úrkomu í kjölfar skriðuhrinunnar í desember og einnig er verið að byggja upp reynslu á túlkun gagna úr nýjum mælitækjum.
Staða rýmingar verður endurmetin á morgun, en búist er við hægt kólnandi veðri á miðvikudag og á fimmtudag verður aftur komið frost til fjalla.
Fjöldahjálparstöðin í Herðubreið verður opin eins og þörf þykir. Þjónustumiðstöð almannavarna verður áfram opin í Herðubreið á Seyðisfirði en einnig er hægt að senda inn fyrirspurnir á netfangið This email address is being protected from spambots. You need JavaScript enabled to view it. og hringja í 839 9931 utan opnunartíma.
Eftirtalin hús eru rýmd:
Öll hús við Botnahlíð
Múlavegur 37
Baugsvegur 5
Austurvegur 36, 38b, 40b, 42, 44, 44b, 46b, 48, 50, 52, 54 og 56.
Fossgata 4, 5 og 7
Múli, Hafnargata 10, 11, 12, 14, 15, 16b og 18c
