Rýmingu aflétt á hluta Seyðisfjarðar í dag
Rýmingu verður aflétt á Seyðisfirði norðan Fjarðarár í dag. Íbúar eiga von á tilkynningu um það innan tíðar. Áfram er fylgst grannt með svæðinu ofan austanverðar byggðarinnar.„Við munum aflétta rýmingum á hluta bæjarins í dag og bæjarbúum verður þá leyft að snúa aftur. Þeir sem ekki eru í húsum á rýmingarsvæði komast þá aftur í sín hús. Ég bið þá að fara að engu óðslega, heldur gera þetta í rólegheitunum.
Það var stöðufundur í morgun og ástandið hefur klárlega batnað verulega í fjallinu. Það sést einfaldleg með að horfa upp eftir," segir Jens Hilmarsson, varðstjóri hjá lögreglunni á Austurlandi.
Gefið verður út kort yfir það svæði sem óhætt verður að koma á en Jens segir það ná eitthvað austur fyrir ána.
Starfsmenn Rarik hafa frá því skriðurnar féllu unnið hörðum höndum að því að koma rafmagni á mikilvægustu staði og hefur það gengið ágætlega. Áfram er unnið að undirbúningi hreinsunarstarfs.
