Rífandi gangur og mikil bjartsýni í Fljótsdalshreppi
„Það er rífandi gangur og mikil bjartsýni og gleði hér í Fljótsdalshreppi,“ segir Helgi Gíslason sveitarstjóri Fljótsdalshrepps. Eins og kunnugt er af frétt hér á Austurfrétt er Fljótsdalshreppur það sveitarfélag þar sem íbúum fjölgaði hlutfallslega mest á landinu á liðnu ári.Í tölum frá Þjóðskrá kemur fram að íbúum Fljótsdalshrepps fjölgaði um 14% á tímabilini frá 1. desember í fyrra fram að síðustu mánaðarmótum. Íbúar fóru úr að vera 86 og í 98.
„Okkur vantar bara tvo einstaklinga til að ná 100 íbúum og þegar það gerist höldum við veislu,“ segir Helgi. Hann bendir þó á að ekki sé mikill fjöldi að baki íbúaaukingunni.
„Ég og fjölskylda mín fluttum lögheimili okkar hingað í ár eða í gamla húsið hans Hákons Aðalsteinssonar og þar sem við erum þrjú talsins erum við fjórðungur af íbúaaukningu ársins,“ segir Helgi.
Fram kemur í máli hans að það sé þó með ólíkindum hve fjölbreytt atvinnulíf sé í ekki fjölmennari sveitarfélagi.
„Sem dæmi má nefna að við erum við með smíðaverkstæði og hafa smiðir og handlagnir menn haft nóg að gera í ár í viðhaldsvinnu á íbúðahúsnæði í sveitarfélaginu fyrir utan að tvö ný íbúðahús hafa verið í byggingu í ár,“ segir Helgi.
Ennfremur nefnir Helgi skógarvinnslu þar sem fimm til sjö manns vinna að jafnaði og fyrirtæki á borð við Fljótsstöð, Óbyggðasetrið og Sauðagull svo dæmi séu tekin. Þá eru ótalin fyrirtæki í ferðaþjónustu eins og gistiheimilið og reksturinn í kringum Hengifoss.
