Ræsing Fjarðabyggðar: Er þetta þitt tækifæri?
Nýsköpunarmiðstöð Íslands í samstarfi við Sveitarfélagið Fjarðabyggð og Alcoa leita að góðum viðskiptahugmyndum sem auka við flóru atvinnulífsins í sveitarfélaginu. Kynning á verkefninu „Ræsing Fjarðabyggðar“ verður næstkomandi föstudag í Kirkju- og menningarmiðstöðinni á Eskifirði.
Áhersla verður lögð á að leita uppi viðskiptahugmyndir sem meðal annars fela í sér nýsköpun, eru atvinnuskapandi í Fjarðabyggð og eru ekki í beinni samkeppni við önnur fyrirtæki á svæðinu.
Þetta er kjörið tækifæri fyrir þá sem ganga með viðskiptahugmynd í maganum en hafa ekki látið verða af því að koma henni á koppinn.
Fundurinn hefst klukkan 12:00 og er öllum opinn, en allir geta sótt um þátttöku í verkefinu. Boðið verður upp á léttar veitingar á meðan fundinum stendur.
