Ræða við samstarfsaðila fyrir stöðina á Reyðarfirði
Framkvæmdastjóri Hringrásar segir fyrirtækið eiga í viðræðum við samstarfsaðila á Austurlandi um áframhaldandi starfsemi starfsstöðvar fyrirtækisins á Reyðarfirði. Starfsemi hennar var stöðvuð fyrir jól.
„Við erum í viðræðum við samstarfsaðila á svæðinu um áframhaldandi móttöku á efni þegar þar að kemur. Ég á von á að það samstarf geti hafist á næstu vikum,“ segir Kristján Ólafsson, framkvæmdastjóri Hringrásar.
Umhverfisstofnun stöðvaði starfsemina á Reyðarfirði 21. desember síðastliðinn þar sem enginn starfsmaður var til að taka á móti spilliefnum. Starfsemi fer ekki aftur af stað fyrr en úr hefur verið bætt. Stofnunin nýtti þar heimild til að stöðva starfsemi samstundins sé alvarleg hætta talin á ferðum.
Austurfrétt hefur óskað eftir frekari gögnum um starfsemi Hringrásar á Reyðarfirði frá Umhverfisstofnun en þau hafa ekki enn borist.