Neyðarstig áfram í gildi á Seyðisfirði
Neyðarstig verður áfram á Seyðisfirði og hættustig á Eskifirði. Þetta kemur fram í tilkynningu frá lögreglunni á Austurlandi.
Almannavarnadeild ríkislögreglustjóra og lögreglustjórinn á Austurlandi funduðu með ofanflóðasérfræðingum Veðurstofu Íslands, aðgerðarstjórn, vettvangsstjórn og fulltrúum mikilvægra innviða og stofnana á Austurlandi nú fyrir hádegi.
Hættustig almannavarna er áfram í gildi með rýmingum á ákveðnu svæði á Eskifirði. Unnið er að mælingum á Oddskarðsvegi og staðan endurmetin síðar í dag.
Fjöldahjálparstöð í Kirkju- og menningarhúsinu að Dalbraut 2 er opin í dag.
Neyðarstig almannavarna er áfram í gildi á Seyðisfirði með rýmingum. Ofanflóðasérfræðingar Veðurstofu Íslands ásamt samstarfsaðilum vinna að frekari mælingum og athugunum á skriðusvæðum á Seyðisfirði. Þar verða skilgreind hættuvæði auk þeirra sem eru talin örugg. Aðgerðarstjórn mun svo í framhaldi ákveða hvernig best sé að framkvæma heimför íbúa á örugg svæði. Stefnt er að því að kynna það skipulag formlega milli klukkan 14 og 15 í dag.
Mynd: Ríkislögreglustjóri.