Mesta fjölgunin í Fljótsdalshreppi
Mesta hlutfallsleg fjölgun íbúa í sveitarfélögum landsins undanfarið ár var í Fljótsdalshreppi. Fjölgun var í öllum sveitarfélögunum fjórum á Austurlandi.Þetta kemur fram í nýjum tölum frá Þjóðskrá Íslands fyrir íbúaþróun frá 1. desember 2019 til 1. desember síðastliðins.
Tölurnar í ár eru nokkuð sérstakar því þetta er í fyrsta skipti sem þær eru gefnar fyrir Múlaþing sem þýðir að ekki er hægt að bera saman þróunina í gömlu sveitarfélögunum fjórum sem sameinuðust í ár.
Fjölgunin í Múlaþingi er 1,5%. Þar vekur þó athygli að íbúarnir eru akkúrat 5.000 talsins. Fjarðabyggð er áfram fjölmennasta sveitarfélagið eystra með 5.088 íbúa og þar er fjölgunin 0,3% líkt og á Vopnafirði.
Fljótsdalshreppur er það sveitarfélag á landsvísu þar sem íbúum fjölgar mest hlutfallslega eða 14%. Þeim fjölgar úr 86 í 98 eða um 12. Mest fjölgum þar utan er í Tjörneshreppi um 9% og síðan Mýrdalshreppi og Tálknafjarðarhreppi um rúm 6%.
Fjölgun Fljótsdælinga er reyndar enn meira sé farið lengra aftur í tímann því íbúar þar voru 73 1. desember fyrir tveimur árum.
Fjölgunin á Austurlandi öllu er 1% en íbúum á landsvísu fjölgar um 1,2%. Einhver fjölgun er í öllum landshlutum nema Vestfjörðum. Þar eru tvö þeirra sveitarfélaga þar sem fækkar mest, Reykhólahreppur og Árneshreppur. Mesta fjölgunin á landsvísu er hins vegar í Svalbarðsstrandarhreppi, 9,8%.
Sveitarfélag | 1.12.2018 | 1.12.2019 | 1.12.2020 | Fjöldi | Hlutfall |
---|---|---|---|---|---|
Fjarðabyggð | 5.081 | 5.073 | 5.088 | 15 | 0,3% |
Múlaþing | 4.880 | 4.925 | 5.000 | 75 | 1,5% |
Vopnafjarðarhreppur | 657 | 656 | 658 | 2 | 0,3% |
Fljótsdalshreppur | 73 | 86 | 98 | 12 | 14% |
Austurland | 10.691 | 10.740 | 10.844 | 104 | 1% |