Menningarmiðstöðin Skaftfell slapp óskemmd en lekur
Menningarmiðstöðin Skaftfell virðist hafa sloppið óskemmd undan einni af aurskriðunum sem féllu á Seyðisfjörð í dag. Hinsvegar er minniháttar leki kominn að húsinu.Hanna Christel forstöðukona Skaftfells segir að hún hafi ekki verið í húsinu þegar skriðan skall á og fann sér farveg í læknum sem rennur meðfram húsinu.
„Ég er með skrifstofu á öðrum stað í bænum og hef ekki getað kannað aðstæður sjálf í dag þar sem öllum er meinaður aðgangur að svæðinu,“ segir Hanna.
„Hinsvegar er mér tjáð og að því ég best veit að engar skemmdir hafi orðið á Skaftfelli,“ segir hún. „Fyrir utan að einhver lítilsháttar leki er kominn á jarðhæð hússins sem ugglaust má rekja til skriðunnar.“