Meiri kvóti til Breiðdalsvíkur: Fögnum þessari niðurstöðu
Oddviti Breiðdalshrepps gleðst yfir ákvörðun Byggðastofnunar um að bæta við 100 tonna byggðakvóta frá og með núverandi fiskveiðiári. Það eigi að duga til að tryggja áframhaldandi vinnslu á staðnum.
Stjórn Byggðastofnunar ákvað á síðasta fundi sínum að auglýsa eftir samstarfsaðilum um nýtingu 100 tonna viðbótaraflaheimilda á Þingeyri, Flateyri, Suðureyri, Raufarhöfn og Breiðdalsvík. Markmiðið er að efla byggðir sem háðar eru sjávarútvegi og standa frammi fyrir bráðum og alvarlegum vanda vegna skorts á aflaheimilum eða óstöðugleika í sjávarútvegi.
Sveitarstjórn Breiðdalshrepps þrýsti í sumar á úthlutun aflaheimildanna til að tryggja áframhaldandi vinnslu Ísfisks á staðnum en hún hafði verið stöðvuð og útlit var fyrir að hún færi ekki af stað aftur í bráð.
Hákon Hansson, oddviti Breiðdalshrepps, segir viðbótina í samræmi við væntingar sveitastjórnar og vonast til að vinnsla Ísfisks fari af stað aftur í vikunni.
„Við bindum miklar vonir við þessa aukningu og varla hægt að gera ráð fyrir hærra framlagi en fékkst. Því fögnum við þessari niðurstöðu og horfum björtum augum fram á veginn.“