Líkur á rafmagnstruflunum í rokinu
Landsnet varar við að rafmagnstruflanir geti orðið á Austurlandi í miklu hvassviðri sem spáð er á svæðinu í kvöld og á morgun.Veðurstofan hefur gefið út appelsínugulaviðvörun vegna norðvestan ofsaveðurs á Suðausturlandi, Austfjörðum og Austurlandi að Glettingi frá klukkan þrjú í nótt til 18 á morgun, laugardag.
Í tilkynningu frá Landsneti segir að mjög hætt sé við samslætti og/eða fokskemmdum á raflínum. Einkum á það við svæði sem afmarkast af Vopnafirði, Möðrudalsöræfum, Fljótsdalshéraði, Austfjörðum og suður með ströndinni á Breiðamerkursand.
Í færslu frá veðurstofunni Bliku segir óveðrið sé af sérstakri gerð því vindstrengurinn sé knúinn áfram af hitamund á milli Jan Mayen og Grænlands. Gert er ráð fyrir vind í fjallahæð yfir Austfjörðum upp á 50 m/s og hefur vindstyrkurinn aukist í síðustu spám.
Bent er á að vindurinn sé verulega truflaður yfir fjöllunum og nái miklir hnútar og fjallaköst niður fjallshlíðarnar.
Við svipaðar aðstæður hafi áður orðið foktjón, svo sem í Neskaupstað, á Seyðisfirði, Eskifirði, Reyðarfirði og á Fljótsdalshéraði, meðal annars í Jökulsárhlíð. Þá séu rafmagnstruflanir í einhverju mæli líklegar.
Varað er við að ekkert ferðaveður verði á meðan veðrið gengur yfir auk þess sem Austfirðingum er ráðlagt að hefta lausamuni til að fyrirbyggja foktjón.