Leki í kerskála Fjarðaáls
Álver Alcoa Fjarðaáls á Reyðarfirði var aftengt raforkukerfinu í kvöld eftir að leki kom upp í kerskála. Upplýsingafulltrúi segir starfsmenn ekki hafa verið í neinni hættu.Þegar leki kemur upp í keri er það orðið óþétt og rennur þá bráðið ál niður í söfnunarkjallara.
Dagmar Ýr Stefánsdóttir, upplýsingafulltrúi Fjarðaáls, segir enga hættu hafa verið á ferðum en þegar leki kemur óvænt upp þurfi að slá út kerlínunni.
Þá er ýtt á svokallaðan rauðan hnapp og álverið aftengt flutningskerfi raforku á landsvísu, meðal annars til að verja aðra notendur fyrir truflunum. Landsnet sendi frá sér tilkynningu um þá aðgerð.
Leka kerið hefur nú verið tekið í rekstri og verður gert við það á næstu dögum. Kerlínan verður ræst upp á nýjan leik í kvöld.
