Laxar fá leyfi fyrir 3000 tonnum í viðbót í Reyðarfirði
Matvælastofnun veitti í dag fiskeldisfélaginu Löxum rekstrarleyfi til að bæta 3000 tonnum við eldi fyrirtækisins í Reyðarfirði. Fyrir hefur það leyfi til að ala 6000 tonn af laxi.Laxar eru í dag með eldi við Gripalda, Sigmundarhús og Bjarg. Með leyfinu í dag bætist við heimild til að koma fyrir sjókvíum á fjórum stöðum í utanverðum firðinum, annars vegar við Rifsker að norðanverðu, hins vegar við Kolmúla, Vattarnes og Hafranes í firðinum sunnanverðum.
Fyrirtækið mun þar með hafa leyfi til að ala allt að 9000 tonn af frjóum laxi í firðinum. Nýstaðfest áhættumat gerir ráð fyrir að þar sé hægt að ala allt að 14.000 tonn.
Fyrirtækið sótti í byrjun október 2017 um heimild til að ala 10.000 tonn og bíður umsókn upp á 7.000 tonn því enn afgreiðslu. Þá hefur fyrirtækið kynnt áætlun um umhverfismat á 4000 tonna eldi til viðbótar.
Í áliti Skipulagsstofnunar á umsókn Laxa um að ala 10.000 tonn af frjóum laxi er varað við neikvæðum áhrifum af eldinu á vistkerfið í sjónum í næst kvíunum og ógn sem villtu laxastofnum í nálægum ám geti stafað af eldinu. Þar segir að stofnunin telji eldi í slíku magni getað haft veruleg neikvæð áhrif á villta stofna.
Hún telur neikvæðustu áhrifin vera af því ef sjúkdómar og laxalús berist í villta stofna. Fjallað er sérstaklega um nýrnaveiki, sem kom upp í eldi Laxa í Reyðarfirði árið 2018 en hefur ekki greinst aftur eftir slátrun það ár. Þá er komið inn á að nýrnaveiki sé algeng í klakfiski úr Breiðdalsá en hún virðist ekki valda einkennum eða afföllum.
Sömu sögu er að segja um IPN-veiru sem greindist í eldislaxi Laxa í Reyðarfirði síðasta haust. Samkvæmt áliti stofnunarinnar er ekki talin veruleg hætta á að laxalús berist úr laxi í eldinu í villtan lax en ráðlagt að fylgjast vel með.
Í rekstrarleyfinu er meðal annars að finna skilyrði um að áhrif eldisins á vistkerfi í nágrenninu verði vöktuð, viðbrögð við sleppingum vel skilgreind og eldissvæðin lýst upp í skammdeginu.
