Kosið milli tveggja í Hofsprestakalli
Tvær konur sóttu um stöðu sóknarprests í Hofsprestakalli en umsóknarfrestur rann út um miðja síðustu viku. Nýr prestur verður skipaður frá 15. október að undangengnum prestskosningum.
Umsækjendur eru þær Jarþrúður Árnadóttir, guðfræðingur frá Akureyri sem starfað hefur í Áskirkju í Reykjavík og Þuríður Björg Wiium Árnadóttir, guðfræðingur frá Vopnafirði.
Samkvæmt reglum ber að halda prestskosningar fari fjórðungur atkvæðisbærra sóknarbarna fram á það skriflega. Það var gert í Hofsprestakalli. Kjördagur hefur ekki verið ákveðinn.
Undir prestakallið falla Hofssókn, Vopnafjarðarsókn og Skeggjastaðasókn.