Körfubolti: Allt í baklás í þriðja leikhluta
Afleitur þriðji leikhluti gerði út af við Hött sem heimsótti topplið Tindastóls á Sauðarkróki í úrvalsdeild karla í körfuknattleik karla í gærkvöldi. Liðið er enn án sigurs eftir átta deildarleiki.Jafnt var með liðunum og var Höttur meira að segja yfir á tímabili snemma í öðrum leikhluta, mest 24-28. Heimamenn sigu hins vegar fram úr aftur og voru 45-44 yfir í hálfleik.
Í þriðja leikhluta hrökk allt í baklás hjá Hetti enda unnu heimamenn hann 24-6. Hattarmenn voru með fyrstu tvær mínúturnar en þá lokaðist vörn Tindastóls. Næstu stig Hattar komu ekki fyrr en eftir eina og hálfa mínútu í fjórða leikhluta og þá hafði staðan breyst úr því að vera 56-50 í 71-50.
Leikurinn hafði líka breyst úr því að vera í járnum yfir í öruggan sigur Tindastóls. Tindastóll hélt áfram að auka við forskotið og vann leikinn að lokum 91-62. Kevin Lewis var stigahæstur Hattarmanna með 16 stig.
Ekkert verður leikið í vikunni og hefur Höttur því tíu dýrmæta daga til að undirbúa mikilvægan leik við hitt botnliðið, Þór Þorlákshöfn. Þór tekur á móti Val í kvöld sem verið hefur við botninn.
Eftir Þórsleikinn tekur Höttur á móti KR og heimsækir Njarðvík áður en kemur að jólafríi. Keppnistímabilið verður þá hálfnað. Þá heimsækir Höttur 1. deildar lið Breiðabliks í 8 liða úrslitum bikarkeppninnar annað hvort 10. eða 11. desember.