Klæðningin fauk af í Fellum
Klæðning hefur fokið af á um 20 metra kafla á veginum milli Teigabóls og Skeggjastaða í Fellum. Bálhvasst er víða á Austurlandi.
„Ég held ég hafi aldrei farið um Fellin í jafn samfelldu roki,“ segir Sveinn Ingimarsson sem átti leið um svæðið í dag.
Mynd sem hann setti á Facebook hefur vakið nokkra athygli en þar sést hvernig þykk klæðning hefur svipst af á um 20 metra kafla.
Þá brotnaði rúða í Fellaskóla í rokinu.
Víða er rokhvasst á Austurlandi og sýna þó nokkrar veðurstöðvar 40 metra í hviðum, svo sem á Oddsskarði, Öxi, Breiðdalsheiði, Vatnsskarði, í Hamarsfirði og Stafdal. Veginum yfir Fjarðarheiði var lokað á þriðja tímanum.
Lokað var yfir Möðrudalsöræfi í hádeginu eftir að þrjár rútur lentu í vandræðum í Langadal. Þar hefur vindurinn einnig verið 40 metrar í hviðum.
Búist er við hvassviðri fram undir miðnætti.
Mynd: Sveinn Ingimarsson