Jólaserían þokast til baka yfir Fjarðarheiðina
Stöðugur straumur hefur legið í dag til Seyðisfjarðar eftir að rýmingu var aflétt á stórum hluta bæjarins klukkan 14:30.Samkvæmt upplýsingum frá viðbragðsaðilum á staðnum komu fyrstu bílarnir til bæjarins um hálftíma síðar og síðan hefur umferðin verið nokkuð stöðug þótt hún hafi gengið í skorpum.
Þegar Austurfrétt fór yfir heiðina frá Seyðisfirði um klukkan hálf sex í kvöld var umferðin stöðug þótt aldrei væri bíll við bíl. Þegar bærinn var tæmdur á föstudag sögðu sjónarvottar að það hefði verið eins og að horfa á jólaseríu liðast niður Fjarðarheiðina þegar bæjarbúar komu í Egilsstaði.
Serían liggur nú í hina áttina, en vissulega ögn gisnari en hún var fyrir tveimur dögum.
Laust fyrir klukkan sex varð fimm mínútna hlé á umferðinni Héraðsmegin, sem mun vera hið minnsta í dag. Tveir bílar voru þá í áttina að lokunarpóstinum þar. Ekki munu þó allir þeir sem fóru til Seyðisfjarðar ætla að gista þar í nótt.
Rýmingu var í dag aflétt af öllum bænum norðar Fjarðarár og hluta hans austan hennar. Enn er stórt svæði í utanverðum bænum lokað fyrir umferð. Steypuklumpum var í dag komið fyrir á götum til að varna því að fólk fari inn á þau svæði og björgunarsveitarfólk stendur þar vaktina.
Óviðkomandi umferð til Seyðisfjarðar er enn óheimil og gæta viðbragðsaðilar á öllum sem fara um beggja vegna Fjarðarheiðarinnar.