Ítrekað hafnað aðkomu að þjónustuhúsi við Hengifoss
Sveitarstjórn Fljótsdalshrepps er ósátt við að Framkvæmdasjóður ferðamannastaða hefur ítrekað hafnað aðkomu að byggingu á þjónustuhúsi við Hengifoss. Finna þurfi lausn á málinu áður en ferðamannastraumur vex að nýju.Helgi Gíslason sveitarstjóri Fljótsdalshrepps segir að ekki hafi staðið á þeim að leggja þessu máli lið hvað varðar skipulagsmál og fleira. Einnig hafi verið lagt í verulega vinnu við hönnun á þjónustuhúsinu en hreppurinn hafi fengið styrk til þess að hluta til frá sjóðnum.
„Við erum því ekki sátt við afstöðu sjóðsins hingað til,“ segir Helgi.
Fjallað var um málið á nýlegum sveitarstjórnarfundi en þar kom fram að búið sé að senda inn nýja umsókn til Framkvæmdasjóðsins. Á fundinum kom einnig fram að sveitarfélagið er reiðubúið að greiða hærra hlutfall af byggingarkostnaði en vaninn er við uppbyggingu á ferðamannastöðum.
Mikil ásókn ferðamanna hefur verið að Hengifossi á undanförnum árum enda er um að ræða "fjölsóttustu náttúruperlu fjórðungsins", eins og segir í fundargerð.