Íkveikja á Egilsstöðum í rannsókn lögreglu
„Rannsókn er bara í gangi og ekkert hægt að segja meira um það að svo stöddu,“ segir Jónas Wilhelmsson, yfirlögregluþjónn á Egilsstöðum, en eldur kom upp í íbúð í fjölbýlishúsi á Egilsstöðum upp úr hádegi á nýársdag. Ljóst er að um íkveikju var að ræða.
Ágætlega gekk að ráða niðurlögum eldsins, engum varð meint af og ekki þurfti að rýma aðrar íbúðir í fjölbýlishúsinu. Eldurinn kom upp í rúmi í svefnherbergi íbúðarinnar og eru skemmdir á íbúðinni nokkrar. Einn maður var handtekinn á vettvangi en er ekki lengur í haldi. „Það er svo í höndum ákæruvaldsins hvað verður í framhaldinu,“ segir Jónas.
Jónas segir áramótin á Egilsstöðum annars hafa farið sérstaklega vel fram. „Það var ekkert annað sem kom til kasta lögreglu, allt var slétt og fellt.“