Hugarfar er ekki meðfæddur eiginleiki
Jákvætt hugarfar skiptir lykilmáli í hvernig fólk tekst á við hlutina þegar það mætir eiginleikum. Besta leiðin til að skapa jákvætt andrúmsloft í hópi er að tryggja að allir hafi þar hlutverk.Þetta var meðal þess sem kom fram í fyrirlestrum undir merkjum jákvæðrar Fjarðabyggðar sem haldnir voru í sal Grunnskóla Eskifjarðar í síðustu viku. Fyrirlestrarnir eru hluti af verkefninu heilsueflandi samfélagi í Fjarðabyggð.
Alma Sigurbjörnsdóttir, sálfræðingur frá Skólaskrifstofu Austurlands, sagði að hugarfar skipti miklu máli þegar fólk mætti áskorunum í lífi sínu. Það væri ekki meðfæddur eiginleiki og þyrfti að þjálfa.
Flestir þekktu það af eigin reynslu að fæstir hlutir heppnuðust í fyrsta sinn, lykilinn að árangri væri blóð sviti og tár. Fólk þurfi líka að hafa trú á eigin getu og staðreyndin sé sú að það læri mest af reynslunni. Trúin skipti máli hvort fólki reyni þegar það lendi í mótbyr eða einfaldlega gefist upp.
Hinn fyrirlesarinn var Pálmar Ragnarsson, körfuknattleiksþjálfari í Reykjavík, sem vakið hefur athygli fyrir áherslu á að byggja upp jákvæðan anda í þeim hópum sem hann þjálfar og kraftmikla fyrirlestra. Hann lauk verið við lokaritgerð í háskóla þar sem hann kannaði hvort nota mætti sömu aðferðir við að byggja upp jákvæðan anda meðal barnanna sem hann þjálfar og meðal fullorðinna á vinnustöðum.
Sú var niðurstaðan í rannsókn hans. Pálmar sagði hægt að koma því þannig í kring að öllum liði vel á vinnustað en lykillinn að því væri að finna öllum sitt hlutverk. Ekki geti allir spilað sókn og því sé líka þörf á fólki í vörnina. „Fólki líður best þegar það finnur að það skipti máli,“ sagði Pálmar um niðurstöður sínar.
