Hraðahindranir til umræðu á Borgarfirði eystri
Heimastjórn Borgarfjarðar eystri beinir því til umhverfis- og framkvæmdaráðs að gera úrbætur til að auka öryggi vegfarenda og íbúa strax í vor. Lausnin getur m.a. falist í hraðahindrunum.Fjallað var um málið á síðasta fundi heimastjórnarinnar. Þar kom fram að brýnt er að gera ráðstafanir á „Bökkunum“ þ.e. á veginum frá Bakkaá út að húsinu Merki þar sem vegurinn er einbreiður og án gangstéttar. Við ytri enda vegarins er hótel Ferðaþjónustunnar Álfheima, sem gerir út á gönguferðir frá hótelinu. Fimm til sex mánuði á ári er mikil umferð gangandi vegfarenda um veginn sem og akandi.
„Umferðarhraði er oft langt umfram það sem getur talist ásættanlegt og á það við um þorpið allt,“ segir í fundargerð.
„Lausnin gæti falist í að setja hraðahindranir, ítarlegri merkingar eða þrengingar á veginn.“
