Helmingur Austfirðinga les Austurgluggann
Lestur vikublaðsins Austurgluggans mælist 49,3% á Austurlandi í nýlegri könnun. Ekki er marktækur munur á milli aldurshópa í lestri blaðsins.
Lestur blaðsins eykst um rúm tíu prósentustig í nýlegri könnun sem AFL Starfsgreinafélag gekkst fyrir en yfir sex hundruð félagsmenn svöruðu spurningunni um hverja af eftirtöldum staðarmiðlum þeir hefðu lesið, flett eða horft á síðastliðnar vikur.
Svarendur dreifast á svæðið frá Vopnafirði suður að Höfn. Lestur Austurgluggans er langminnstur á Höfn, sem er utan helsta markaðssvæðisblaðsins, sem dregur heildartöluna niður.
Á Höfn sögðust hins vegar 97% svarenda hafa séð Eystrahorn.
Ýmislegt fleira áhugaverð leynist í lestrartölum Austurgluggans. Ólíkt flestum öðrum miðlum er ekki marktækur munur milli aldurshópa og er blaðið meðal annars með 47% lestur í aldurshópnum 18-24 ára.
Mestur er lesturinn á Fljótsdalshéraði og í Fjarðabyggð þar sem yfir 60% lesa blaðið sem kemur út vikulega á föstudögum. Konur og karlar lesa blaðið nokkuð jafnt og tekjuhærri frekar en tekjulægri.
Austurglugginn mælist næst vinsælasti fjölmiðill svæðisins í könnuninni á eftir Dagskránni sem er með 72,3% lestur. Lestur hennar hefur heldur dregist saman síðustu ár.
Áhorf á N4 mælist 48,7% í könnuninni og er munurinn á sjónvarpinu og Austurglugganum innan skekkjumarka. Lestur Austurlands, sem kemur út á tveggja vikna fresti er 28,7%.
Austurglugginn og Austurfrétt eru með sameiginlega ritstjórn en Útgáfufélag Austurlands ehf. gefur miðlana út.