Hálslón snemma á yfirfall
Hálslón fór á yfirfall á föstudagskvöld. Einu sinni áður í rekstrarsögu Kárahnjúkavirkjunar hefur það gerst svo snemma. Rennsli þar er nú meira en í yfirstandandi Skaftárhlaupi.Samkvæmt frétt frá Landsvirkjun fór lónið á yfirfall klukkan ellefu á föstudagskvöld. Tíu ár eru síðan það fylltist fyrst, en aðeins árið 2010 fór það fyrr á yfirfall, þá 28. júlí. Samkvæmt upplýsingum frá fyrirtækinu er reiknað með að lónið fari á yfirfall um mánaðarmótin ágúst/september í meðalvatnsári.
Hlýtt sumar er ástæða þess hve snemma lónið fer á yfirfall en hlýtt hefur verið eystra og mikil bráðnun á Brúarjökli.
Þegar lónið fer á yfirfall myndast fossinn Hverfandi við vesturenda stíflunnar þaðan sem hann fellur 90-100 metra niður í Hafrahvammagljúfur og getur hann orðið vatnsmeiri en Dettifoss.
Rennsli í honum í gær mældist 212 m3/sek en fór í fyrra mest í 625 m3/sek um mánaðarmótin september/október. Til samanburðar má nefna að rennsli í yfirstandandi Skaftárhlaupi mældist mest 1557 m3/sek við Sveinstind aðfaranótt sunnudags og 257 m3/sek við Kirkjubæjarklaustur um morguninn.
Tvö önnur miðlunarlón Landsvirkjunar fylltust nánast á sama sólarhringnum og Hálslón. Öll lón fyrirtækisins eru þar með komin á yfirfall. Það gerðist síðast svo snemma árið 2006.
Þá hefur Ufsarlón í farvegi Jökulsár á Fljótsdal, sem er hluti af Kárahnjúkaverkefninu, verið haldið opnu að hluta síðan í vor. Girðingar meðfram ánni sem eru hluti af varnarlínum sauðfjárveikivarna eyðilögðust á stórum kafla í flóðum síðasta haust og hefur vatni verið hleypt í árfarveginn fyrr en önnur ár til að viðhalda varnarlínunni.
Þess utan var það sett sem skilyrði í virkjunarleyfinu á sínum tíma að yfirfallsvatn yrði nýtt skipulega á ferðamannatíma til að viðhalda fossum árinnar.
Mynd úr safni Landsvirkjunar.