Hækkaði í ánni um 20 sentímetra á klukkutíma - Myndir
„Hér eru allir vegir að fara í sundur,“ segir Eiður Ragnarsson frá Bragðavöllum í Hamarsfirði. Þar hefur verið úrhellisrigning frá því í gærkvöldi og mikill vöxtur í öllum ám.
Eiður segist hafa fylgst með því hvernig hækkaði hafi í Hamarsánni um að lágmarki 20 sentímetra milli klukkan níu og tíu í morgun. „Þetta er með því mesta sem ég hef séð.“
Áin flæðir yfir veginn inn að Hamarsseli og er að sögn Eiðs nálægt því að taka hann í sundur. Starfsmenn Vegagerðarinnar fylgjast með framvindunni þar sem vegurinn er einnig varnargarður sem veitir vatni frá nýju brúnni yfir Hamarsá.
Eiður segir rigninguna í kringum Bragðavelli heldur hafa minnkað en enn virðist rigna þar fyrir innan. Þess vegna bætir heldur enn í ána.
Samkvæmt tölum frá Veðurstofunni hækkaði vatnsyfirborðið í Geithellnaá, sem fellur í Álftafjörð, um 2,5 metra frá klukkan 8 í gærkvöldi til 8 í morgun. Það náði hámarki þá og hefur lítillega sjatnað í ánni síðan.
Myndir: Eiður Ragnarsson