Gott norðanrok: Ófært í Hamarsfirði vegna veðurs
Veginum frá Djúpavogi að Þvottá var lokað upp úr hádeginu vegna veðurs. Um 60 m/s vindhviður hafa mælst í Hamarsfirði.„Það er gott norðanrok hér en enginn snjór að ráði. Eftir 25 ár á Reyðarfirði finnst manni þetta ekki snjór,“ segir Eiður Ragnarsson.
Hann býr á Djúpavogi en rekur ásamt fjölskyldu sinni ferðaþjónustu að Bragðavöllum í Hamarsfirði. Tvær vindhviður upp á 60 m/s hafa mælst þar á mæli Vegagerðarinnar í dag og ein í gær.
„Það er að hvessa hér,“ segir Eiður sem var í Hamarsfirði í morgun.
Auk Hamarsfjarðarins er vegirnir yfir Fagradal, Fjarðarheiði, Hellisheiði, Mývatns- og Möðrudalsöræfi og Vatnsskarð lokaðir vegna snjóa og óveðurs. Þannig hefur staðan verið nánast síðan á þriðjudag.
„Við fengum ferðamenn í gistingu í gærkvöldi sem tóku beygjuna til okkar þegar þeir sáu lokunarskiltin. Þeir fara ekkert í dag heldur sitja og spila í bústaðnum,“ segir Eiður.