Glataði 15 heyrúllum í krapaflóði
„Það eru um 15 heyrúllur sem glötuðust í þessu krapaflóði en þær lentu í ánni við bæinn og skoluðust síðan í burtu þegar áin ruddi sig í leysingum skömmu síðar,“ segir Bergþór Steinar Bjarnason bóndi í Hjarðarhlíð í Skriðdal. Krapaflóð féll á bæinn í upphafi vikunnar með þessum afleiðingum.Bergþór Steinar segir að krapaflóðið hafi fallið á bæinn á sunnudagsnóttina eða snemma morguns á mánudag. Heimilisfólkið í Hjarðarhlíð varð ekki vart við þegar flóðið féll. „En það ber á að líta að það var hávaðarok og rigning þegar flóðið féll,“ segir hann.
Krapaflóðið féll á stafla af heyrúllum sem raðað hafði verið upp meðfram hlöðunni við bæinn. Við það tvístruðust rúllurnar og fóru um víðan völl en um 20 þeirra lentu í eða við ánna. Auk þess skemmdist eitt hornið á hlöðunni lítillega.
Fram kemur í máli Bergþórs Steinars að honum hafi tekist að ná nokkrum rúllum af árbakkanum en hinar hafi horfið niður árfarveginn í leysingunum. „Það getur verið að ég finni eitthvað af þeim aftur við árbakkana neðar í ánni," segir hann.
Bergþór Steinar segir að það sé bagalegt fyrir sig að missa þessar heyrúllur þegar svona er liðið á veturinn þar sem heybirgðir hans hafi verið í minna lagi í haust. En hann á von á að hann geti bjargað sér fram á vor með það sem hann á eftir af heyi.
Mynd: Facebook