Fyrsta loðnulöndunin í þrjú ár
Um helgina landaði grænlenska skipið Polar Amaroq tæplega 700 tonnum af frystri loðnu á Eskifirði. Starfsmenn Tandrabergs ehf. hófu löndunina snemma um morguninn og lauk henni um kvöldið. Þessi loðnulöndun markar tímamót því hún er sú fyrsta hér á landi í tæplega þrjú ár.Þetta kemur fram á vefsíðu Síldarinnslunnar. Þar segir að Polar Amaroq fékk aflann í hinu svonefnda trollhólfi austur af landinu. Aflinn fékkst að mestu í þremur holum en fyrsta holið var tekið í mjög slæmu veðri og gaf einungis 20-30 tonn. Loðnan sem veiddist var hin fallegasta og voru um það bil 40 stk. í kílóinu. Nokkur áta var í loðnunni.
„Skipstjóri á Polar Amaroq í veiðiferðinni var Sigurður Grétar Guðmundsson og segir hann það afar góða tilfinningu að vera farinn að veiða loðnu á ný,“ segir á vefsíðunni.
„Polar Amaroq hélt á ný til veiða strax að löndun lokinni. Þegar haft var samband við skipið í morgun var það búið að taka eitt 300 tonna hol og var unnið að frystingu um borð af fullum krafti.“
Mynd: Facebooksíða löndunarfyrirtækisins Tandrabergs
