Fullkomið brúðkaup frumsýnt í kvöld, jafnframt eina sýningin
Ákveðið hefur verið að flýta frumsýningu á leikritinu Fullkomið brúðkaup um einn dag og verður leikritið því frumsýnt í kvöld. Er þetta jafnframt eina sýningin þar sem mjög ólíklegt er að fleiri sýningar verði á leikritinu. Eins og kunnugt er munu allar sviðssýningar falla niður frá og með morgundeginum vegna hertra sóttvarnarreglna.Sólveig Heiðrún Stefánsdóttir segir að prufusýning eða“ generalprufa“ á leikritinu var áformuð í kvöld en henni verður breytt í frumsýningu.
„Svo skellum við bara í lás í ljósi þessarar nýju sóttvarnarreglna,“ segir Sólveig Heiðrún. „Það er mjög ósennilegt að fleiri sýningar verða á þessu verki.“
Fram kemur í máli Sólvegar Heiðrúnar að sýningin í kvöld sé boðssýning fyrir vini og velunnara Leikfélags Fljótsdalshéraðs og því ekki úr mörgum öðrum miðum að spila.
„Við munum taka leikritið upp og sýna það á netinu síðar,“ segir hún.
Aðeins 18 gestir munu geta séð leikritið í kvöld þar sem gera verður ráð fyrir tæknimanni við upptöku á verkinu og starfsmanni.
„Það eru einhver sæti laus fyrir borgandi gesti en annars munum við endurgreiða öllum sem hafa keypt sér miða hingað til,“ segir Sólveig Heiðrún.
Fram kemur í máli hennar að samt sem áður hafi það verið gott fyrir félagsmenn leikfélagsins að hafa unnið að og sett þetta leikrit upp.
