Framhaldsskólarnir opna aftur
Heilbrigðisráðuneytið hefur heimilað nemendum að snúa aftur í dagskóla í Menntaskólanum á Egilsstöðum og Verkmenntaskóla Austurlands.Nemendur fóru heim í byrjun mánaðarins eftir að strangari takmörk voru sett á fjöldasamkomur. Undanþágur voru settar á framhaldsskóla þar sem 30 nemendur máttu vera samankomnir, en þær hjálpuðu í raun aðeins bekkjaskólum en ekki skólum með áfangakerfi eins og þeir austfirsku.
Heilbrigðisráðuneytið hefur nú veitt austfirsku skólunum sameiginlega undanþágu frá sóttvarnareglunum. Staðnám getur því hafist á ný, að uppfylltum ákveðnum skilyrðum. Ekki mega vera fleiri en 30 í hóp, nemendur þurfa að halda eins metra fjarlægð auk þess sem algjör grímuskylda er í skólunum. Skólarnir leggja nemendum til grímur.
Þá er nemendum fyrirskipað að mæta ekki í skóla finni þeir fyrir hvers konar einkennum Covid-19.
Í frétt á vef VA kemur fram að undanþágan sé veitt, meðal annars í ljósi þess að lítið er um smit á Austurlandi. Samkvæmt tölum dagsins af Covid.is er enginn með virkt smit og aðeins einn í sóttkví. Þessar tölur hafa ekki breyst síðustu dag.