Fórnarlamba umferðarslysa minnst á sunnudag
Minningarstundir verða á Breiðdalsvík og í Neskaupstað á sunnudag í tengslum við alþjóðlegan minningardag um fórnarlömb umferðarslysa.Minningarathöfn verður við Björgunarmiðstöðina í Skógarhlíð í Reykjavík klukkan 14:00. Þeirri dagskrá verður streymt en skorað er á landsmenn alla að taka þátt í einnar mínútu þögn.
Frá því að fyrsta banaslysið var skráð hér á landi 25. ágúst 1915 hafa 1592 látist í umferðinni á Íslandi. Á þessu ári hafa sjö einstaklingar látið lífið í umferðinni hérlendis.
Tilgangurinn með deginum er að minnast þeirra sem látist hafa í umferðinni, leiða hugann að ábyrgð hvers og eins í umferðinni. Þá er rík hefð fyrir því á minningardeginum að færa starfsstéttum, sem sinna björgun og aðhlynningu þegar umferðarslys verður, þakkir fyrir mikilvægt og óeigingjarnt starf. Í ár er sérstök áhersla lögð á afleiðingar þess að vera ekki með öryggisbelti í bílum.
Viðburðir eru á sautján stöðum um landið, þar af tveir á Austurlandi. Á Breiðdalsvík mun björgunarsveitin Eining, ásamt slökkviliði og sjúkraflutningum, verða með minningarstund við Lækjarkot. Í Neskaupstað verður kveikt á kertum fyrir utan björgunarsveitarhúsið við aðalgötu bæjarins.
