Fólk virðist versla jólagjafirnar snemma
Verslunarrekendur á Fljótsdalshéraði eru ánægðir með stöðuna í jólaversluninni. Þeir segja hana hafa farið vel af stað og eru bjartsýnir á lokasprettinn.„Þeir helstu sem ég hef talað við innan okkar vébanda eru mjög sátt, segja að verslun gangi mjög vel og fólk virðist versla jólagjafir snemma í ár,“ segir Heiður Vigfúsdóttir starfsmaður Þjónustusamfélagsins Héraði, félagi verslunar- og þjónustuaðila á svæðinu.
Hún segir verslunarrekendur bjartsýna fyrir síðustu viku jólavertíðarinnar, sem fer nú í hönd því ef fram haldi sem horfi megi gera ráð fyrir talsverðri heildaraukningu milli ára.
Hún bendir á að þetta sé sérstaklega gleðilegt á sama tíma og fréttir berist af stóraukinni netverslun frá útlöndum sem Covid-19 faraldurinn virðist eiga sinn þátt í, því Þjónustusamfélagið hafi lagt áherslu á verslun í heimabyggð.
„Við gleðjumst mjög yfir þessum upplýsingum enda hefur markaðssetningin hjá okkur í ár miðað að mjög stórum hluta að því að fá fólk til að versla í heimabyggð og enduðum árið með nýútgefnum jólabæklingi þar sem verslanir auglýsa sínar vörur fyrir jólin.“
