Flest umferðarslys í ágústmánuði
Alls níu umferðarslys urðu austanlands í ágústmánuði með þeim afleiðingum að ellefu einstaklingar þurftu á læknisaðstoð að halda.
Þetta kemur fram í tölfræði Lögreglunnar á Austurlandi en ágústmánuður er þannig versti slysamánuður ársins hingað til í fjórðungnum. Athygli vekur að sunnudagurinn 7. ágúst reyndist sérstaklega slæmur en þann dag urðu þrjú slysanna í mánuðinum.
Alls hafa því orðið 32 umferðarslys á Austurlandi frá áramótum fram til september sem er töluverð fjölgun frá fyrra ári þegar þau voru tuttugu á sama tímabili.
Góðu heilli reyndust fá slysanna í ágúst mjög alvarleg. Aðeins í einu tilviki voru áverkar það alvarlegir að senda þurfti viðkomandi suður til Reykjavíkur með sjúkraflugi. Tveir aðrir voru fluttir á sjúkrahúsið í Neskaupstað en aðrir slösuðust aðeins lítillega.