Fjórtán milljóna afgangur á Borgarfirði
Tæplega fjórtán milljóna króna afgangur varð af rekstri Borgarfjarðarhrepps á síðasta ári, að því er fram kemur í ársreikningi.
Tekur sveitarfélagsins námu 149,4 milljónum, þar af tekjur A-hluta 138,1 milljón.
Rekstrarniðurstaða samstæðunnar var jákvæð um 13,7 milljónir, þar af 18,1 milljón í A-hluta. Innan hans eru helstu lögboðnu verkefni sveitarfélaga sem fjármögnuð eru með skatttekjum.
Í B-hluta eru verkefni fjármögnuð með sértekjum. Algengara er hjá sveitarfélögum að B-hlutinn komi betur út en þessu er öfugt farið hjá Borgarfirði.
Sveitarfélagið stendur nokkuð vel því eigið fé var jákvætt í lok síðasta árs um 271,1 milljón.