Fiskvinnsla í gang á Fáskrúðsfirði
Vinnsla er hafin á ný í frystihúsinu Loðnuvinnslunnar á Fáskrúðsfirði en hún hefur legið niðri frá því fyrir jól vegna verkfalls sjómanna. Keyptur er afli af krókaaflamarksbátum.
Vinnsla hófst aftur á fimmtudag en hráefnið kemur frá Dögg SU og Hafrafelli SU. Sjómenn bátanna eru í Landssambandi smábátasjómanna og því ekki í verkfalli.
„Það er gott að ná vinnslu aftur af stað. Vinnslan hefur gengið vel og strax var mjög góð mæting,“ segir Friðrik Mar Guðmundsson, framkvæmdastjóri Loðnuvinnslunnar.
Verkfallið hefur haft nokkur áhrif á Loðnuvinnsluna líkt og fleiri sjávarútvegsfyrirtæki. „Þetta hefur haft mikil áhrif á okkur. Við erum með þrjú skip stopp í landi og vinnsluna bara á 60% afköstum ef veður leyfir.“
