HB Grandi: Engar breytingar fyrirhugaðar á Vopnafirði
Forstjóri HB Granda segir engar breytingar framundan á starfsemi fyrirtækisins á Vopnafirði þar sem það er helsti atvinnuveitandinn. Tilkynnt var í gær að fyrirtækið myndi hætta botnfiskvinnslu á Akranesi.
„Það eru ekki fyrirhugaðar neinar breytingar á Vopnafirði,“ segir í svari Vilhjálms Vilhjálmssonar, forstjóra HB Granda við fyrirspurn Austurfréttar í kjölfar tíðindanna af Akranesi.
Botnfiskvinnslan þar hefur veitt 93 starfsmönnum vinnu. Ekki er ljóst hve mörgum verður sagt upp en ferli er hafið að hópuppsögnum. Í tilkynningu félagsins segir að rekstrarhorfur fyrir botnfiskvinnslu hafi ekki verið lakari í áratugi.
Fyrir rúmu ári tilkynnti fyrirtækið um uppbyggingu bolfiskvinnslu á Vopnafirði til að mæta sveiflum í uppsjávarveiðum. Að sögn Vilhjálms, sem áður stýrði Tanga á Vopnafirði, stendur til að prufukeyra þá vinnslu á næstu dögum.
Hagnaður HB Granda nam 3,5 milljörðum króna í fyrra og hefur verið lagt til að hluthöfum verði greiddir 1,8 milljarðar króna í arð. Ákvörðunin verður tekin á aðalfundi í byrjun maí. Arðgreiðslur fyrir árið 2015 námu þremur milljörðum króna.