„Byggjum áfram á góðu samstarfi“
Síldarvinnslan í Neskaupstað hefur aukið eignarhlut sinn í útgerðarfélaginu Runólfi Hallfreðssyni ehf. á Akranesi um helming en félagið gerir út Bjarna Ólafsson Ak.
Síldarvinnslan heftur átt 38% í Runólfi frá árinu 2003 en félagið var upphaflega stofnað af hjónunum Runólfi Hallfreðssyni og Ragnheiði Gísladóttur. Ragnheiður andaðist á vormánuðum og þá lá fyrir að þrjú barna þeirra vildi selja sinn hlut.
Úr varð að Síldarvinnslan nýtti sér forkaupsréttinn en áfram eiga bræðurnir Gísli og Runólfur samanlagt tæp 25% í félaginu og stýra félaginu ásamt Síldarvinnslunni.
„Samstarf félaganna hefur ávallt gengið vel. Ég á ekki von á öðru en samstarf Síldarvinnslunnar og þeirra bræðra verði gott eftir sem hingað til og Bjarni Ólafsson muni halda áfram að vera mikilvægur fyrir hráefnisöflun Síldarvinnslunnar,“ sagði Gunnþór Ingvason, framkvæmdastjóri Síldarvinnslunnar í samtali við Austurfrétt.
Nýr Bjarni Ólafsson kom til fyrirtækisins í sumarbyrjun í fyrra. Skipið er með 4,7% kolmunnakvótans, 2,5% loðnukvótans og 2,4% úr norsk-íslenska síldarstofninum.
Í yfirlýsingu segir Gísli Runólfsson að „vart hefði verið hægt að hugsa sér betri niðurstöðu.“ Bjarni verður gerður áfram út með svipuðum hætti.
