Brotthvarf Steingríms opnar sæti ofarlega á lista VG
Vopnfirðingurinn Kári Gautason, núverandi framkvæmdastjóri þingflokks Vinstrihreyfingarinnar – græns framboðs, hefur ákveðið að sækjast eftir sæti ofarlega á framboðslista flokksins í Norðausturkjördæmi í næstu þingkosningum. Núverandi oddviti listans, Steingrímur J. Sigfússon, tilkynnti um helgina að hann sæktist ekki eftir endurkjöri.Bæði Kára og Steingrímur tilkynntu um ákvörðun sína á aðalfundi kjördæmisráðs VG sem haldinn var um helgina í fjarfundi. Steingrímur hefur setið á Alþingi fyrir Norðurlandskjördæmi eystra og síðar Norðausturkjördæmi frá árinu 1983.
Hann tók fyrst sæti á framboðslista árið 1978 og hefur leitt framboðslista í síðustu 11 þingkosningum. Steingrímur sat fyrst á þingi fyrir Alþýðubandalagið en frá 1999 fyrir VG, sem hann átti stóran þátt í að stofna.
Á sínum langa þingferli hefur Steingrímur verið landbúnaðar- og samgönguráðherra, fjármála, sjávarútvegs og landbúnaðarráðherra, efnahags og viðskiptaráðherra og atvinnuvega og nýsköpunarráðherra.
Flokkurinn á tvo þingmenn í kjördæminu, en í öðru sætinu á eftir Steingrími síðast var Bjarkey Olsen Gunnarsdóttir frá Ólafsfirði, sem er formaður þingflokksins. Í þriðja sæti var síðan Ingibjörg Þórðardóttir, framhaldsskólakennari í Neskaupstað.
Í morgun greindi Vopnfirðingurinn Kári Gautason frá því á Facebook-síðu sinni að hann hefði gefið það út á fundinum um helgina að hann myndi gefa kost á sér ofarlega á lista VG í kjördæminu í kosningunum 25. september á næsta ári.
Kári, sem er alinn upp á Grænalæk í Vopnafirði, starfar í dag sem framkvæmdastjóri þingflokks VG en hann er meðal annars fyrrverandi ráðunautur og hefur stundað meistaranám í búfjárkynbótum.
Helstu mál sem ég mun setja á oddinn tengjast auðlindamálum, sjávarútvegi og landbúnaði. Ég vil slá vörð um þau lífsgæði sem eru fólgin í því að lifa og starfa á landsbyggðinni. Til þess þarf að leiðrétta ójöfnuð í samgöngu-og flutningsmálum, bæta aðgengi að heilbrigðisþjónustu enn frekar og gera alvöru úr því að innleiða störf án staðsetningar,“ segir hann í yfirlýsingu sinni.