Bræla og leiðindaveður á miðunum
Bræla og leiðindaveður er á miðunum sem togarar Síldarvinnslunnar eru á í dag. Togararnir eru að reyna að veiða annað en þorsk þessa stundina.Þetta kemur fram á vefsíðu Síldavrinnslunnar. Þar segir að ísfisktogararnir Gullver NS, Vestmannaey VE og Bergey VE lönduðu allir í gærdag. Gullver landaði á Seyðisfirði en Vestmannaey og Bergey í Neskaupstað.
Afli Gullvers var 95 tonn en afli Vestmannaeyjar rúm 50 tonn og Bergeyjar 62 tonn. Öll skipin héldu út til veiða á ný strax að löndun lokinni. Gert er ráð fyrir að Vestmannaey og Bergey haldi suður fyrir land og verður lögð áhersla á að skipin veiði annað en þorsk á næstunni.
Á vefsíðunni er rætt við Rúnar L. Gunnarsson skipstjóra á Gullver í morgun er togarinn var staddur í brælu úti í Seyðisfjarðardýpi.
„Síðasti túr gekk alveg þokkalega. Við byrjuðum að vísu í Berufjarðarálnum í leit að karfa en þar var sannast sagna ekkert að hafa. Síðan vorum við mest á Fæti og Herðablaði og þar fengum við þorsk og einnig dálítið af ýsu. Nú erum við í leiðindaveðri og þannig verður það í dag, en síðan mun það væntanlega lagast,“ segir Rúnar.
Einnig var rætt við Egil Guðna Guðnason stýrimann á Vestmannaey sem segir að eftir löndunina í gær var haldið suður eftir.
„Nú erum við í Sláturhúsinu úti fyrir Mýrunum í leiðindaveðri að reyna að veiða kola. Hér er ástæða til að reyna enda erum við í skjóli af jöklinum. Áformað er að leggja áherslu á annað en þorsk næstu daga. Bergey er á alveg sama róli og við,“ segir Egill Guðni.
Mynd: Síldarvinnslan/Egill Guðni Guðnason.
