Boðar hafnarframkvæmdir á Djúpavogi og Seyðisfirði
Meðal þeirra hafnarframkvæmda sem eru áætlaðar á næstu árum eru endurbygging Bjólfsbakka á Seyðarfirði og endurbygging stálþils á Djúpavogi.Þetta kom fram í ávarpi sem Sigurður Ingi Jóhannsson, samgöngu- og sveitarstjórnarráðherra, flutti nýlega á ársþingi Hafnasambandsins, Fjallað er um málið á vefsíðu Stjórnarráðsins.
Sigurður Ingi segir að fjármagn til hafna og mikilvægra sjóvarna hafi verið stóraukið á kjörtímabilinu og síðast í tengslum við fjárfestingaátak ríkisstjórnarinnar í vor.
Í ár verður 1,6 milljarði króna varið til hafnaframkvæmda og 1,2 milljarðar eru settir í hafnir í fjárlagafrumvarpi fyrir árið 2021. Alls sé áætlað að verja tæpum sjö milljörðum króna á sex ára tímabili frá 2020-2025.
Ráðherra sagði að ýmis stór verkefni væru á teikniborðinu. Vegagerðin ynni að rannsóknum og undirbúningi mikilvægra framkvæmda sem eru til þess fallin að styrkja atvinnulíf og leiða til atvinnusköpunar í viðkomandi byggðalögum.
Sem fyrr segir er endurbygging stálþils á Djúpavogi m.a. vegna fiskeldis og endurbygging Bjólfsbakka á Seyðisfirði meðal þessara verkefna.
„Mikilvægi hafna fyrir nýtingu sjávarauðlinda, millilandaviðskipti Íslands og ferðaþjónustu verður seint ofmetið. Þjónusta þeirra eru á margan hátt ómissandi hlekkur í að viðhalda og bæta lífskjör á Íslandi,“ segir Sigurður Ingi.