Betra að senda einn lækni austur en marga sjúklinga suður
Heilbrigðisstofnanir á landsbyggðinni eiga í vandræðum með að fá til sín og halda í lækna og annað fagfólk. Forsvarsmenn Heilbrigðisstofnunar Austurlands segja yfirvöld skorta stefnu um sérfræðiþjónustu.
„Okkur vantar fagfólk, einkum lækna en líka aðrar stéttir,“ sagði Nína Hrönn Gunnarsdóttir, framkvæmdastjóri hjúkrunar hjá HSA, á íbúafundi á Egilsstöðum fyrir skemmstu.
Af hálfu stofnunarinnar hafa verið stigin skref til að reyna að tryggja sér fagfólk. Samstarf við skólana á svæðinu hefur verið aukið, enda sýna rannsóknir að þeir sem alast upp á svæðinu skila sér best til baka í störf hér þegar fram líða stundir. Þá er vonast til að ný miðlæg heilsugæslustöð á Reyðarfirði verði eftirsóknarverðari en einmenningshéruð.
Stjórnendur HSA hafa verið afar gagnrýnir á hversu illa gangi að koma sérfræðingum út á land, þeir vilji helst veita þjónustuna af skrifstofum sínum í Reykjavík.
„Það hefur skort stefnu yfirvalda um þjónustu sérfræðinga, einkum lækna. Það þarf að ákveða hvaða sérfræðiþjónusta er nærþjónusta, hvað á að að vera í hverjum fjórðungi.
Við höfum leitað eftir skýrum svörum þar um en ekki fengið. Við höfum bent á að það sé betra að senda einn mann til okkar. Við erum ágætlega tækjum búin, einkum í Neskaupstað.“
Þessa dagana er verið að ganga frá ráðningum tveggja sálfræðinga hjá HSA. Enginn slíkur hefur verið fastráðinn frá haustinu 2015 en auglýsingar skiluðu loks árangri nú. „Þegar við höfum ráðið í þær stöður þarf að fara í að byggja upp þjónustu við fólk með geðræn vandamál,“ sagði Nína.
Ekki tilbúnir í harkið
Austurland er ekki eini landshlutinn þar sem gengur illa að fá fagfólk til starfa. Sigrún Blöndal, formaður Sambands sveitarfélaga á Austurlandi, sagði að fundað hefði verið með landlækni um málið og þau svör fengist að skorturinn væri viðvarandi um allt land.
„Reyknesingar fundu læknana sína eftir leit. Þeir reyndust vera verktakar í Stykkishólmi!
Það skortir fagfólk um allt land. Skortur á fagfólki er sú ógn steðjar að okkur. Við sjáum þetta líka á dýralæknunum, þeir vilja frekar vera á höfuðborgarsvæðinu og lækna smádýr níu til fimm frekar en að koma út á land í harkið. Það eru ekki allir eins og Hákon Hansson á Breiðdalsvík sem gert hefur 1400 keisaraskurði á rollum.“
Erfitt að kynna Austurland sem kost
Nína Hrönn bætti við að kynna þyrfti samfélagið í heild og markaðssetja fyrir heilbrigðisstarfsfólki. Undir það tók Hrönn Garðarsdóttir, læknir á Egilsstöðum.
„Mönnunarmálin eru dagleg spurning hjá okkur. Bæði íbúum og gestum fjölgar en læknum fækkar.
Það gengur æ verr að fá fólk til að koma og vera. Það er rómantískt að koma og vera mánuð á sumri eða yfir páska en það er erfiðra að fá fólk til að koma og byggja upp metnað og þjónustu. Á því eru örugglega margar skýringar en við höfum reynt að komast að því hverjar þær eru,“ sagði Hrönn.
Hún benti á að nám bæði hjúkrunarfræðinga og lækna taki sex ár og er þá ekki talið með sérfræðinám lækna. Á þessum sex árum fari læknarnir í fjóra og hálfan dag út fyrir höfuðborgarsvæðið.
„Það má velja Keflavík og Selfoss sem dreifbýli og keyra alltaf heim á kvöldin. Það er erfitt að kynna okkur sem kost.
Okkar sterkasta von er í fólki sem er alið upp á Austurlandi og veit hvernig er að búa utan höfuðborgarsvæðisins. Ég virðist vera eini kynlegi kvisturinn sem er alinn upp í borginni en flutti út á land. Það hefur enginn annar gert hvorki næstu tíu ár á undan né eftir mér.“