Beitir með 900 tonn af ekta Japansloðnu
Beitir NK kom í morgun til Neskaupstaðar með 900 tonn af loðnu sem fer til vinnslu í fiskiðjuveri Síldarvinnslunnar. Loðnan fékkst í fjórum köstum í Meðallandsbugtinni og er um "ekta Japansloðnu" að ræða að því er segir á vefsíðu Síldarvinnslunnar.
„Við fengum þennan afla í gær og í gærkvöldi. Besta kastið, tæp 500 tonn, fékkst eftir kvöldmatinn. Þegar við komum á miðin í gær var talsvert mikið að sjá en það var álandsvindur og þá hljóp loðnan upp í fjöruna," segir Tómas Kárason skipstjóri Beitir í samtali á vefsíðu Síldarvinnslunnar.
"En þetta endaði mjög vel og þetta er fínasta loðna sem við erum með. Þetta er 40% hrygna, 13-14% hrognafylling og átulítið. Hér er um ekta Japansloðnu að ræða," “ segir Tómas.
"Mér líst vel á framhaldið, það er ekkert annað í boði og gaman að loðnuveiðar skuli hafnar á ný. Nú er allur íslenski flotinn að fara af stað og þá fást betri upplýsingar um hvernig loðnan gengur."