Auglýsa íbúðir til leigu á Borgarfirði eystri
Sveitarfélagið Múlaþing auglýsir til leigu íbúðarhúsnæði á Borgarfirði eystri. Um er að ræða íbúðir í nýbyggðu parhúsunum Lækjarbrún og Lækjargrund. Í hvoru húsi eru tvær íbúðir, önnur tveggja herbergja 55,3 m2 og hin þriggja herbergja 68,4 m2.Þetta kemur fram á vefsíðu Múlaþings. Þar segir að leiga er áætluð 90.000 kr á mánuði í þeim minni og 110.000 kr á mánuði í þeim stærri. Orkunotkun er ekki innifalin í leiguverðil. Í hvoru húsi er ein varmadæla og mun kyndikostnaður skiptast á milli íbúða eftir stærð.
Heimastjórn Borgarfjarðar mun útdeila íbúðunum í samræmi við reglur sveitarfélagsins á fundi sínum í fyrstu viku marsmánaðar. Gert er ráð fyrir að hægt verði að flytja inn í íbúðirnar snemma í mars þótt utanhússfrágangi verði ekki lokið.
Jafnframt auglýsir sveitarfélagið til útleigu íbúðina Ásbrún 2 sem er nú þegar laus.
Skilafrestur umsókna er til og með 2. mars. Reglur sveitarfélagsins um úthlutun á leiguhúsnæði í eigu Múlaþings (aðrar en félagslegar íbúðir) má nálgast á heimasíðu sveitarfélagsins. Umsækjendum íbúða Lækjarbrúnar og Lækjargrundar er bent á að skattframtal síðasta árs þarf að fylgja umsókn, að því er segir á vefsíðunni.
Mynd: mulathing.is
