Aðhald skilar árangri í rekstri Djúpavogshrepps
Tæplega þrjátíu milljóna króna afgangur var á rekstri Djúpavogshrepps á síðasta ári. Árið áður var tæplega átta milljóna tap hjá sveitarfélaginu.
Gauti Jóhannesson, sveitarstjóri, skýrir viðsnúninginn með aðhaldi í rekstri. Rekstrarkostnaður hafi dregist saman um rúm 9%. Þá hafi farmlög úr Jöfnunarsjóði hækkað.
Tekjur Djúpavogshrepps á síðasta ári voru tæpar 590 milljónir og hækka um 40 milljónir milli ára. Hrein rekstrargjöld voru 512 miljónir og standa í stað.
Fjögurra milljóna afgangur er af A-hluta, sem eru lögboðin verkefni fjármögnuð með skatttekjum samanborið við tæplega 28 milljóna tap árið áður. Laun og rekstrarkostnaður standa þar nánast í stað meðan framlög úr jöfnunarsjóði og útsvarstekjur hækka.
Fræðslu- og uppeldismál eru sem fyrr fyrirferðamesti málaflokkurinn en um helmingur útgjalda Djúpavogshrepps er á því sviði. Útgjöld þar hækka. Mesta hagræðingin er í sameiginlegum kostnaði, um níu milljónir.
Skuldaviðmið sveitarfélagsins er 91% sem er vel undir þeim kröfum sem gerðar eru til sveitarfélaga.