57 þúsund tonna loðnukvóti: Þetta er voða dapurt
Austfirskir útgerðarmenn binda vonir við að Hafrannsóknastofnun leggi út í annan leiðangur til að leita loðnu. Stofnunin kynnti í dag niðurstöður sínar úr tveimur rannsóknarleiðöngrum í mánuðinum og veiðiráðgjöf ársins.
„Þetta er voða dapurt. Vonandi fara menn í annan leiðangur,“ segir Þorsteinn Kristjánsson, forstjóri Eskju.
Mælingar í haust bentu til þess að stofninn væri það lítill að engin loðna yrði veidd á vertíðinni. Tvö skip Hafrannsóknastofnunar og Polar Amaroq, sem er í eigu grænlensks dótturfélags Síldarvinnslunnar, fóru í tvo leiðangra dagana 11. – 20. janúar til að meta stærð veiðistofnsins.
Í fyrri mælingunni 12. – 15. janúar fundust 398 þúsund tonn af kynþroska loðnu frá sunnanverðum Vestfjörðum norður um og austur að Kolbeinseyjarhrygg. Í seinni ferðinni 17. – 20 janúar fundust 493 tonn frá Kolbeinseyjarhrygg og vestur um.
Meðaltal mælinganna, 446 þúsund, er mat á stærð veiðistofnsins. Stofnunin leggur því til að kvóti ársins verið 57 þúsund tonn.
Þorsteinn segir að það þýði um 1000 tonn í hlut Eskju, sem jafngildi um einum túr á flaggskipinu Aðalsteini Jónssyni.
Í tilkynningu Hafró segir að í seinni mælingunni hafi hluti svæðisins verið kominn undir hafís. Þorsteinn vonast til frekari göngum undir ísnum.
„Við höfum ekkert heyrt beint frá stofnuninni en eigum von á að leiðangurinn og reiknireglan verði kynnt fyrir okkur. Í einni ferðinni er loðna alveg upp við ísinn og vonandi sjá menn hag í að rannasaka þetta betur með annarri ferð í byrjun febrúar.“