Stöðvarfjörður: Hálft Söxuver horfið og þakplötur á ferðinni
Lögreglumenn eru á leið á Stöðvarfjörð til að kanna skemmdir sem orðið hafa þar í óveðri í nótt. Þakplötur fuku af frystihúsinu og gömul verðbúð er að hálfu horfin. Íbúi segist ekki hafa upplifað annað eins þann aldarfjórðung sem hann hefur búið í þorpinu.
„Við hjónin erum farin í skjól í húsinu. Við erum ekki í stofunni, það gengur svo mikið á gluggunum. Við höfum búið hér í 25 ár og þetta er langt um versta veðrið.“
Þetta segir Albert Geirsson sem býr á Stöðvarfirði. Hann er með veðurstöð á þaki hússins sem sýndi tuttugu mínútur í níu vindhviðu upp á 57,2 m/s. Bæði klukkan hálf tíu og hálf ellefu komu hviður upp á 50 m/s. Þá fór loftþrýstingurinn niður í 943 millibör klukkan hálf sex. „Þetta er búið að vera svakalegt veður í morgun.“
Hús Alberts stendur innarlega í þorpinu og skammt inn af því stóð gömul verbúð sem kallast Söxuver.
„Þetta er stórt hús á einni hæð, trégrind byggð ofan á steingrunni og það er horfið af hálfu leyti. Það hefur verið notað sem geymsla og verkstæði og ég sé að spýtnabrak úr því hefur fokið á rafstöðvarhúsið fyrir innan.“
Samkvæmt upplýsingum frá lögreglu hefur orðið „töluvert tjón á húsnæði“ á Stöðvarfirði í óveðrinu í nótt en lögreglumenn frá Fáskrúðsfirði eru á leið yfir til að kanna aðstæður.
Þakplötur rifnuðu af frystihúsinu í nótt en þær hafa farið af fleiri húsum í bænum. Rúður hafa brotnað og skemmdir orðið á skúrum í höfninni.
„Það fýkur drasl yfir húsið hjá mér öðru hvoru,“ sagði Albert.