![](http://www.austurfrett.is/images/stories/news/folk/thorunn_egils_bondi.jpg)
Kannast ekki við að vera á leið í ráðherrastól
Þórunn Egilsdóttir, þingmaður frá Vopnafirði, kannast ekki við fréttir um að hún kunni að verða næsti ráðherra Framsóknarflokksins ef uppstokkun verður gerð á ríkisstjórninni um áramótin.
„Nei, ekki mér vitanlega," svaraði Þórunn þegar Austurfrétt spurði hana að því hvort hún væri að verða ráðherra.
Kjarninn fjallaði um jólin um mögulegar breytingar á ríkisstjórninni. Þar var því haldið fram að nafn Þórunnar væri „oftast nefnt" ef nýr ráðherra úr flokknum kæmi inn í stjórnina.
Þórunn kvaðst koma af fjöllum þegar Austurfrétt hafði samband við hana, hafandi verið net- og sjónvarpslaus á heimili sínu, Hauksstöðum, um jólin en bærinn er efsti bær í byggð í Vopnafirði.
Heimilisfólkið þar notast við gervihnattamóttakara þar sem aðrar sendingar nást ekki og hann bilaði. Varahlutir fóru ekki af stað úr Reykjavík fyrr en í dag.