Tekið til eftir storminn á Eskifirði – Myndir
Mikið tjón varð á Eskifirði í morgun þegar ein alversta lægð sem Austfirðingar hafa kynnst gekk yfir svæðið. Eftir hádegi var unnið að því að taka til og lappa upp á það sem hægt var eftir storminn.
Um leið og komið var yfir Hólmahálsinn tók að bera á athöfnum í bænum en þrjú áberandi gul ljós voru á jafn mörgum stöðum.
Við Eskifjarðará hafði sjórinn höggvið í veginn og grafið verulega undan honum þannig að bæði endar brúarhandriðsins héngu framaf. Þar var unnið við að keyra efni í kantana, treysta veginn og koma vegriðunum fyrir aftur.
Úti á Mjóeyri var verið að dæla upp úr lögnum sem sjór hafði komist í og vera eyrina. Sjórinn át af eyrinni í nótt og gekk nærri gistihúsum sem þar eru. Gestir í þeim munu þó hafa verið rólegir. Þannig voru einu þeirra Hollendingar sem sögðust vera vanir flóðum.
Randúlfssjóhúsið og bryggjan við það hafa fest sig í sessi sem eitt helsta kennileiti Eskifjarðar. Skemmdir voru sjáanlegar á bæði húsinu og bryggjunni.
Verið var að sjóða í skemmd á Aðalsteini Jónssyni sem lamdist utan í bryggjuna. Hún bar einnig merki átakanna þar sem molnað hafði úr steypukantinum.
Víða mátti sjá skemmdir á bryggjum eða húsum við sjóinn. Verst var ástandið inni í bæ við hlið lögreglustöðvarinnar, gegnt grunnskólanum. Þar mátti sjá bæði gjörónýtar bryggjur og sjóhús.
Um kaffileytið var verið að ljúka við að hreina götur og helsta lausa brakið. Margir bæjarbúar voru hins vegar á ferðinni fram og aftur Strandgötuna til að skoða verksummerki.