Stofna áhugahóp um göng milli Eskifjarðar og Héraðs
Stofnaður hefur verið hópur áhugamanna um jarðgöng milli Eskifjarðar og Héraðs. Hvatamenn að stofnun hópsins eru: Gísli Hjörtur Guðjónsson og Stefán Víðisson.Í tilkynningu frá hópnum segir að markmið hans sé að kynna, og koma í umræðu, helstu kosti þess að bora jarðgöng milli Eskifjarðar og Héraðs.
Samkvæmt hugmyndum þeirra yrðu boruð 7,9 km löng göng innst úr Eskifirði undir Eskifjarðarheiði sem myndu opnast út í Svínadal.
Kostirnir séu meðal annars öruggari samgöngur á milli fjögurra stærstu þéttbýliskjarnanna á Austurlandi, greiðari samgöngur milli flugvallarins á Egilsstöðum og sjúkrahússins í Neskaupstað, stytting vegalengda, sameining atvinnusvæða og bætt aðgengi að ýmiss konar þjónustu.
Með þessum göngum verði vegurinn yfir Fagradal ekki notaður yfir vetrartímann en þar sé oft illviðrasamt.
Hann sé í dag með umferðarþyngstu vegum landsins utan höfuðborgarinnar. Með jarðgöngum milli Héraðs og Eskifjarðar væri búið að tengja saman stærstu þéttbýlilskjarna á Austurlandi og þar með að gera svæðið að einu atvinnusvæði óháð færð á fjallvegum.
