Isavia hélt umfangsmikla almannavarnaæfingu á Egilsstaðaflugvelli
Um 200 manns tóku þátt í flugslysaæfingu sem haldin var á Egilsstaðaflugvelli á laugardag.Þátttakendur á æfingunni voru frá Isavia og öllum viðbragðsaðilum á svæðinu í kringum Egilsstaði. Æfð voru viðbrögð við flugslysi innan flugvallargirðingar, s.s. björgunar- og slökkviaðgerðir, greining og aðhlynning slasaðra auk umönnunar óslasaðra og aðstandenda.
Auk þess var áhersla lögð á samhæfingu vegna flutnings slasaðra, boðunarkerfi, stjórn, samhæfingu, fjarskipti, rannsókn á vettvangi og fleira.
Fjöldi viðbragðsaðila tóku þátt í æfingunni, meðal annarra Isavia, almannavarnardeild ríkislögreglustjóra, slökkvilið, lögregla, heilbrigðisstofnanir, sjúkraflutningar, björgunarsveitir, Rauði krossinn, Landhelgisgæslan, Neyðarlínan og prestar.
Frá árinu 1996 hefur Isavia haldið yfir 40 flugslysaæfingar og eru þær jafnan stærstu hópslysaæfingar sem haldnar eru ár hvert og mikilvægar heildarviðbragðskerfi Íslands, hvort sem um flugslys eða önnur hópslys er að ræða.
Um tvær til fjórar æfingar eru haldnar ár hvert, en stór flugslysaæfing er haldin á hverjum flugvelli á fjögurra ára fresti. Byggja þær á flugslysaáætlun sem gerð hefur verið fyrir hvern flugvöll. Að æfingu lokinni eru viðbrögð rýnd og kannað hvað var gert vel og hvað mætti bæta.